12/15 Tesla股价累跌五成

电动车公司特斯拉（Tesla）行政总裁马斯克（Elon Musk）一向不务正业，自从10月底收购社交媒体Twitter后，一门心思投入到Twitter业务当中，期间疯狂「派大信封」，之后又弹弓手叫被裁员工回巢，结果当然搞到一头烟！最惨系佢完全忽略Tesla业务，结果导致公司股价暴跌，令身家大缩水，更因此失去世界首富之位！

Tesla股价年初至今已经累跌逾五成，《福布斯》数据显示，其身家已缩至1,768亿美元。相较去年11月最辉煌时期约3,200亿美元，目前佢嘅身家已经消失咗1,432亿美元（约11,169亿港元），相当于香港半年嘅本地生产总值（GDP）。

不过，就算马斯克将佢所有精力投放喺Twitter度，都未必有用。相反，因为马斯克治理下嘅Twitter吓怕咗唔少广告商，佢「一时一样」嘅管理方式导致员工、平台用户无所适从，包括之前认证用户真实身分嘅「蓝剔」功能收费计划，推出后短短几日又撤回，最近又突然重新推出，今时今日咁嘅服务又点可能令用户满意？

Twitter办公室传欠租数周

最近更有消息指，Twitter嘅办公室因为拖欠数周租金畀业主投诉，原因可能系佢不满租金过高，想重新商讨条款；仲有消息话佢唔想赔足员工遣散费，宁愿同前员工对簿公堂。估唔到世界前首富竟然咁度缩，唔知系咪因为身家大缩水，所以想悭番啲钱过年关……