19/8 日圓拆倉未了

「知否世事常變，變幻原是永恆，此中波浪起跌，當然有幸有不幸」（1977年電視劇《家變》主題曲歌詞），股民應有深切體會！月初，市場風高浪急，驚套息拆倉、驚經濟衰退，飽歷8月2日「黑色星期五」、8月5日「黑色星期一」；但一周後，風眼中嘅日股、美股已回補一半跌幅，兩周後，大致完成回補。上周五，日股升3.9%，已連升3日，相對黑一低位反彈22.4%，重返黑五前水平；美股道指、標指、納指各升0.2%，前者已連升4日，後兩者更連升7日，相對黑一低位分別反彈5.6%、8.5%、12.2%，都重返黑五前水平。市場忽跌忽升，如同《易經》講嘅「無常」，係常態！

日圓兩周貶5% 套息交易又嚟過

咁快驚完，套息交易拆倉完了嗎？所謂套息交易，就係借低息貨幣，買高回報資產。全球可自由兌換嘅貨幣，主要有：美元、歐元、英鎊，仲有三種商品貨幣（價格與某種商品價格高度相關）——澳元、紐元、加元，以及兩種套息交易貨幣（因其低息）——日圓、瑞郎，今年以嚟，瑞、加、歐、英、紐嘅央行已先後減息，美國聯儲局9月減息亦成定局；至於日本央行，3月結束負利率後，7月31日再加息，引爆套息交易大拆倉。日股喺黑一跌12.4%，創1987年以嚟最大跌幅；美股波動指數喺黑一高見65.73，僅次於1929年大蕭條。隔日，日央副行長表示，如果金融市場不穩，唔會加息，於是日圓拆倉收歛。

據美國商品期貨交易委員會（CFTC）數據，黑一過後，當周日圓非商業淨空倉規模較近期高位減半；摩根大通更按全球套息籃子即期數據推算，75%套息交易已平倉，意味潛在嘅拆倉對市場嘅衝擊唔會好似黑一咁大；不過，據《彭博》報道，日圓套息交易有捲土重來之勢。日圓兌每美元喺黑一高見141.68後，上周五低見149.36，貶值逾5%。野村注意到，投資者又開始借日圓，買高回報資產，重建倉位。據ATFX Global Markets數據，上周日圓淡倉增加30%至40%，主要嚟自對沖基金同高淨值客。

美國減息當前 公用股息率吸引

美國上周四公布嘅7月零售銷售按月升1%，高過預期嘅0.4%，係上年1月以嚟最大升幅，反映美國經濟唔差；上周五公布嘅8月密歇根大學消費信心指數初值亦由7月嘅66.4升至67.8，高過預期嘅66.7，抵銷部分經濟衰退預期壓力。美股三大指數再升0.2%；追蹤美國上市中概股表現嘅中國金龍指數，受中資科網股業績帶動，升1.9%；港股ADR比例指數高水118點或0.7%。恒指上周五收17430，升1.9%，突破5月中以嚟嘅下降軌，重越250天牛熊線，以頭肩底量度升幅計，上望18150。

港股正值業績期，上周除咗中資科網股業績搶眼，長和系亦派成績表，上周三有電能（006）、長江基建（1038），上周四有長和（001）、長實（1113）。當中，長建派中期息0.72元，較上年同期增加0.01元。長建上市至今，連續27年增加派息，2020年以嚟，中期息每年增0.01元，末期息每年增0.02元，按此推算，今年末期息料為1.87元，計及中期息0.72元，全年派息2.59元。長建現價56.25元，預測股息率4.6厘。喺美國減息預期下，本港公用股股息率再顯吸引力，長建股價今年以嚟累升36%，更屬「有升有息」。